Алматыдағы Бұқар Жырау бульварында орналасқан, 1983 жылдан бері қызмет етіп келе жатқан жылу құбыры жаңартылмақ. Ұзындығы 1,3 шақырым болатын бұл жылу трассасы 200-ден астам нысанды жылумен қамтамасыз етеді. Бұл туралы SunqarNews.com ақпарат агенттігі хабарлады.
Жоспарлы жұмыс аясында, 2025 жылдың 23 сәуірінен 10 маусымына дейін, Бұқар Жырау бульварының оңтүстік жағы, Сергей Марков көшесінен Римский-Корсаков көшесіне дейінгі аралықта автокөлік қозғалысы ішінара тоқтатылады. Көлік қозғалысындағы уақытша шектеулерге түсіністікпен қарап, айналма маршруттарды алдын ала қарастыру сұралады.
Алматыда биыл 35 шақырымдық жылу желілері жаңартылып, олардың тозу деңгейі 54%-ға дейін төмендетіледі. Бұған дейін 21 сәуір мен 6 мамыр аралығында қаладағы сегіз ауданда жылу желілеріне гидравликалық сынақ жүргізілетіні туралы ақпарат хабарланған.
