Атырау облысында ауыл шаруашылығы жұмыстары белсенді түрде жалғасуда. Облыс әкімінің баспасөз хатшысы Руслан Жұмағазиевтің мәлімдеуінше, 638,7 гектарға картоп, 3070 гектарға көкөніс, 1415 гектарға бақша дақылдары егілуде. Сонымен қатар, 4530 гектар аумаққа мал азықтық дақылдар себілді. Бұл туралы SunqarNews.com ақпарат агенттігі хабарлады.
Бизнес өкілдері қазіргі таңда 9553,7 гектар аумақта егістік жұмыстарын аяқтаған. Оның ішінде 2680,5 гектар жерге картоп, көкөніс, бақша және мал азықтық дақылдар отырғызылды. Мамыр айына дейін тағы 100 гектар жер жыртылмақ, деп мәлімдеді Жұмағазиев.
Жалпы егін егу жұмыстарына 780 техника тартылған: 450 трактор мен 330 арнайы ауыл шаруашылық машиналары мен су насостары. Бұл маусымдық жұмыстарды оңайлатуға септігін тигізуде.
Сондай-ақ, биыл шетелдік жұмысшыларды тарту үшін 680 квота бөлінді. 1 сәуірге дейін 355 шетелдік азаматқа рұқсат берілді. Облыста өңірлік тұрақтандыру қорында 400 тонна көкөніс қоры бар екенін де еске сала кетейік.
