Өткен демалыс күні Форт-Шевченко қаласына қайтып келе жатқан су көлігі экипажы Құлалы аралы аумағынан браконьерлік ауларды тауып алды. Бұл туралы SunqarNews.com ақпарат агенттігі хабарлады.
Команда Маңғыстау облыстық балық инспекциясына дереу хабар берді. Түпқараған аудандық балық инспекциясының бас маманы Андрей Руцкийдің мәлімдеуінше, оқиға орнына жергілікті инспекторлар, шекарашылар және Атырау облысынан «Бекіре-2025» рейді аясында келген жедел топ кіріскен.
Заңсыз аулардан екі итбалық және бес бекіре тұқымдас балықтың өлі денелері табылды. Балықтар жартылай бұзылған күйде болған. Оқиғаға қатысты қылмыстық іс қозғау мақсатында барлық материалдар Түпқараған аудандық полиция бөліміне тапсырылды. Бұған дейін де Маңғыстауда браконьерлерден табылған өлі итбалықтар жөнінде дерек тіркелген болатын.
