Біржан-Акаралы тасжолы жергілікті тұрғындарды әбден шаршатты. Бұл туралы SunqarNews.com ақпарат агенттігі хабарлады. Қыста қар еріп, күзде жаңбыр жауған кезде жол балшыққа айналып, ауылдардан Зайсан қаласына жету қиындайды. Тұрғындардың айтуынша, жедел жәрдем де уақытылы келе алмай, жағдай ушығып отыр. Әкімдікке бұл мәселені бірнеше жыл бойы айтып келе жатса да, шешімін таппаған.
Зайсан ауданының әкімдігі жолдың жағдайы жөнінде ресми мәлімет берді. Әкім орынбасары Данияр Серіковтің айтуынша, 12 шақырымдық Біржан-Акаралы тасжолы аудандық тұрғын үй-коммуналдық шаруашылығы басқармасының балансында тұр. Жолды орташа жөндеуді 2025 жылға жоспарлап отыр. Тұрғындардан да жөндеу бойынша ұсыныстар түскен.
Биылғы жылы Тасбастау ауылының көшелері 61,7 миллион теңгеге жөндеуден өтеді. Айнабұлақ ауылындағы 9 көшені орташа жөндеуге 210 миллион теңге бөлінген. Біржан ауылындағы кейбір көшелердің жобалау-сметалық құжаттары дайындалып, 80 миллион теңгеге жөндеу жоспарланған. Дайыр ауылындағы Абай көшесін 58 миллион теңгеге жөндейді. Көкжыра ауылындағы екі көше де орташа жөндеуден өткізіледі. Қарабұлақ ауылындағы Абай көшесін жөндеуге 69,6 миллион теңге көзделген.
Сонымен қатар, аудандық маңызы бар «Зайсан-Жаңатұрмыс-Шүршітсу» (0-12 шақырым) жолы да биыл жөнделетін болады. Бұған дейін, аймақ тұрғындары Шығыс Қазақстанда жолдың су шайып кеткені туралы хабарлаған болатын.
