Атыраудағы университеттің жатақханасы құлап түсті. 1972 жылы салынған №2 жатақхананың апатты жағдайда екенін жоғары оқу орнының баспасөз қызметі растады. Бұл туралы SunqarNews.com ақпарат агенттігі хабарлады.
Университеттің мәліметінше, 2022 жылдың қарашасында жатақхананың 1-қабатының қабырғасында ақау табылып, ғимараттың техникалық қауіпсіздігін анықтау үшін конкурс жарияланған. «PFA compani» ЖШС жүргізген сараптама нәтижесінде жатақхананың апатты күйде екені дәлелденді. Барлық студенттер басқа жатақханаларға көшірілді.
Атырау облысының құрылыс басқармасы апатты жағдайдағы екі жатақхананы бұзып, 1000 орындық жаңа нысанның жобасын дайындады. Жобалаушысы «Авангард ОК» компаниясы болып табылады, жоба сараптамаға жолданған. Университеттің мәліметінше, жатақхананың құлауынан ешкім зардап шеккен жоқ.
Естеріңізге сала кетейік, жақында елордадағы Мұңайтпасов стадионы мен «Қазақстан» спорт сарайының құрылысының аяқталуы туралы хабарланған еді.
