Астана қаласының әкімдігі биыл елордада 14,7 шақырымды құрайтын 43 инфрақұрылымдық жобаны жүзеге асыруды жоспарлап отыр. Жобалардың ішінде сегіз нысан толық аяқталады, 28-і жалғасады және тағы жетеуі басталады. Бұл туралы SunqarNews.com ақпарат агенттігі хабарлады.
Жоспарға сәйкес, Қ. Қайсенов көшесі Бұқар жырау көшесінен Ұлы Дала даңғылына дейін, Бұқар жырау көшесі Әл-Фараби даңғылынан Жошы хан көшесіне дейін, сондай-ақ Рысқұлов көшесі Мәңгілік Ел даңғылынан Нұра-Есіл каналына дейін созылады. Сонымен қатар жол инфрақұрылымын жақсарту аясында 60-тан астам көшеде орташа жөндеу жұмыстарын жүргізу көзделген. Жалпы ұзындығы 70 шақырымды құрайтын бұл жолдар қозғалыс қауіпсіздігі мен тұрғындардың жайлылығын арттыруға бағытталады, деп хабарлайды Kazinform.
10 сәуірден бастап Алаш тас жолы, Қорғалжын тас жолы және Сығанақ көшесінде жөндеу жұмыстары басталды. Сонымен қатар Жаңақоныс, Қарталы, Фахд бен Абдул Азиз, Герцен және Ш. Бөкеев тұрғын алаптарындағы көшелер де қамтылған. Естеріңізде болса, Қазақстан бойынша биыл 13 мың шақырым жолда жөндеу жұмыстары жүзеге асады.
