Анкара қаласында Қазақстан мен Түркия арасындағы стратегиялық әріптестік пен парламентаралық қарым-қатынасты дамыту мәселелері талқыланды. Кездесу барысында қос елдің депутаттары Парламент басшылығы деңгейінде келіссөздер жүргізіп, әріптестікті нығайту жолдарын қарастырды. Бұл туралы SunqarNews.com ақпарат агенттігі хабарлады.
Қазақстан Мәжілісінің төрағасы Ерлан Қошанов Нуман Куртулмушты Түркия Ұлы Ұлттық Мәжілісінің 105 жылдығымен құттықтап, екі ел арасында шынайы достық пен туыстық қарым-қатынастың маңыздылығын атап өтті. Ол мемлекет басшылары арасындағы мызғымас достықтың маңызын айрықша белгіледі.
Парламентаралық ынтымақтастықтың болашағы жан-жақты талқыланып, заң шығару бағытындағы байланыстарды нығайту келісілді. Мәжіліс спикері «Парламент – халық өкілдерінің жиналу орны. Сондықтан депутаттарымыздың жиі кездесуі қажет» деп атап өтті.
Қос тарап көпжақты форматта да ықпалдастықты дамытуға мүдделі. Түркі мемлекеттері Парламенттік Ассамблеясы аясында ынтымақтастыққа ерекше назар аударылады. Биыл Қазақстан бұл ұйымға төрағалық етеді, ал 11-12 маусымда Астанада ТҮРКПА-ның отырысы өтпек.
Түркия парламенті басшысы Нуман Куртулмуш қазақ-түрік ынтымақтастығының барлық салада қарқынды дамитынын атап, өткен кездесулердің маңызын жоғары бағалады. Әрі сауда-экономикалық, ауыл шаруашылығы және әскери-техникалық саладағы байланыстар да қарастырылды.
Сапар барысында делегация мүшелері Ататүрік кесенесіне гүл шоқтарын қойып, Түркия мемлекетінің негізін қалаушы Мұстафа Кемал Ататүрікке тағзым етті, сондай-ақ бірнеше мәдени орындарды аралады.
