Туризм және спорт министрі Ербол Мырзабосынов жартылай марафондағы қайғылы жағдайдан кейін министрлік мұндай шараларға қатысты талаптарды күшейтетінін мәлімдеді. Бұл туралы SunqarNews.com ақпарат агенттігі хабарлады. Ал «Қазақстандағы цифрлық туризм — 2025» форумында Казинформ тілшісі министрдің орынбасары Ержан Еркінбаевқа аталған талаптар жөнінде сұрақ қойды.
Вице-министр Ержан Еркінбаевтың айтуынша, бұл мәселе цифрлық даму, инновациялар және аэроғарыш өнеркәсібі вице-министрімен бірге талқыланған. Олардың ұсыныстары арасында пульсометр немесе спорт сағаттарын тағып, ыңғайлы пульс аймағында жүгіруге кеңес беру бар. Алайда марафон — бұқаралық спорт түрі болғандықтан, бұл жерде қатаң шектеулер қою тиімсіз болмақ. Дүниежүзі бойынша статистика бойынша 80 мың марафоншының арасында бір адам қайтыс болады екен. Екі тәжірибелі марафоншының қайтыс болғаны өкінішті жағдай, бірақ шектеулермен оны толығымен жою мүмкін емес. Министр қазіргі уақытта федерация мен спорт мамандарын шақырып, олардың ұсыныстарын талқылап жатыр.
Еске салайық, Алматыда жартылай марафонға қатысқан екі адамның өмірімен қоштасқаны бұған дейін хабарланған болатын.
