Озық технологиямыз дамыған мына заманда жастарымызды интернет шырмауынан аластату үшін, бос уақыттарын тиімді пайдалану мақсатында әл-Фараби атындағы Қазақ ұлттық университетініңhttps://farabi.university жоғары оқу орнына дейінгі білім беру факультеті жоғары оқу орнына дейінгі дайындық кафедрасында әртүрлі бағыттағы 20-ға жуық клубтар мен үйірмелер жұмыс атқарады. Солардың ішінде бірнешеуіне тоқталып өтетін болсақ «Өлкетану» мәдени-танымдық клубышетелдерден келген студенттерімізді Алматының көрікті жерлерімен таныстыру жұмыстарын жүргізеді. «Қызықты старт» спорт клубы түрлі спорттық жарыстар ұйымдастырып студенттердің денсаулығын шынықтыру жұмысымен шұғылданады. «Поэзия патшалығы» атты поэзия клубы өлең шығаруға бейім, дарынды студенттерді іріктеп, сайыстар ұйымдастырады және ақын-жазушылармен кездесу кештерін өткізеді. «Кәсіби бағдар беру» мәдени танымдық клубы студенттердің өз мамандығын дұрыс таңдауға бағыт беру мақсатында құрылған. «Мұражайтану» үйірмесіАлматы қаласындағы мұражайларға саяхаттар ұйымдастырады.
«Жас шебер» үйірмесі үйірме білім алушы жастарымызды қолөнерге баулиды. Үйірме мүшелері кафедрамызда білім алатын өзге елдерден білім сапарымен келген қандас бауырларымыз болып табылады. Нақ осы бауырларымыз өзге елде жүрсе де елімізде ұмыт бола бастаған бабалар мұрасын сақтап елімізге жеткізуде. Үйірменің мақсаты – бабалар мұрасын жоғалтпай, ұрпақтан ұрпаққа жалғасуына кішкене де болса үлес қосу.Үйірмеміздің құрылғанына біршама уақыт болды. Біраз жетістіктеріміз де баршылық. Жас шеберлермен жасалған бұйымдар көрмелерге шығарылып, кейіннен жәрмеңкелер ұйымдастырылды. Қолдан өндірілген бұйымдар сатып алушылар тарапынан қызығушылығын туғызып, арнайы тапсырыстар қабылдап, аз ғана болса да халқымыздың тұрмыстық қажеттілігіне жарап жатыр. Сонымен қорытар болсақ, жастардың ұлттық мәдениеті мен дәстүрлердің негіздерін меңгергенде ғана жалпы адамзаттық мұраларды игеріп дүниеге дұрыс көзқарасы, озық ойлау жүйесі қалыптасатыны анық.
Әл-Фараби атындағы Қазақ ұлттық университетінің
оқытушылары Ибрагимова М.Н., Мужигова Г.М., Нұртілеуова С.Р.
