Батыс Қазақстан облысы Бөрлі ауданында 21 сәуірде Аралтал шағынауданында ПАЗ автобусы жанып кетті. Бұл туралы SunqarNews.com ақпарат агенттігі хабарлады.
БҚО Төтенше жағдайлар департаментінің мәліметінше, өрт 17.40-та оқшауланып, толықтай 17.56-да сөндірілді. Мекеме басшысы Талғат Темірғалиевтің айтуынша, өрттің шығу себептері мен келтірілген залал әлі де анықталуда.
Бөрлі ауданы білім беру бөлімінің мәліметінше, автобустың жануы №8 орта мектеп тұрақ алаңында, шамамен 17.25-те басталған. Оқиға кезінде оқушылар болмаған, ал көлік жүргізушісі оң қолынан жарақат алды.
Батыс Қазақстан облысы денсаулық сақтау басқармасының хабарлауынша, жедел жәрдем келіп жеткенде ер адамның зардап шеккені расталды. Оған алғашқы медициналық көмек көрсетіліп, аудандық ауруханаға жеткізілді. Ер адамға 1-дәрежелі күйік диагнозы қойылып, денесінің 3 пайызы зақымданған.
Айта кетейік, бұған дейін Батыс Қазақстанда жүк көлігі де өртенген болатын.
