Ұлты басқа болса да, қазақ тілін жетік білетін елімізде шетел азаматтары көп. “Астарлы ақиқат” бағдарламасында бас қосқан өзге ұлт өкілдері тілді қалай тез үйренудің құпиясымен бөлісті.
Қазақ ақындарының өлеңін оқып, күйін тартып, ән шырқап жүрген шетел азаматтары қазіргі таңда баршылық. Бұрын таңсық көрінгенмен қазір оған көзіміз де, өзіміз де үйрене бастадық.
Мәселен “Астарлы ақиқат” бағдарламасына келген Абдулла Хусейн Мухаммед соның дәлелі. Сомали ұлтының өкілі Алматыда оқиды. Ол қазақ тілінде еркін сөйлейді, тіпті тойларда асабалық қызмет атқарады.
“Мен Алматыдағы Сүлеймен Демирел атындағы универститетте оқимын. Қазақстанға 2016 жылы келдім. Алғаш келгенде қазақша тек “сәлеметсіз бе” деген сөзді ғана білетінмін. 1 жыл 8 айдың ішінде қазақ тілін үйреніп алдым. Алматының такси жүргізушілеріне рахмет айтамын. Мені қазақшаға үйреткен солар. Африкакдан біз 30 бала келгенбіз. Олардың ешқайсы тіл білмейді. Мен соларға аудармашы болып жүрмін”, — дейді Абдулла Хусейн Мухаммед.
Абдулла қазақ тілінен бөлек орыс, өзбек, түрік тілдерінде еркін сөйлейді. Ол бір жыл бұрын қазақ қызымен шаңырақ көтерген.
“Ұлы жүздің қызын алдым. Қазір Шымкентте тұрып жатырмыз. Некемізді мұсылманша қидық”, — дейді африкалық жігіт.
“Астарлық ақиқат” бағдарламасында қонақта болған Дулат Тастекей Абдулла Хусейн Мухаммедке арнайы жазуы бар футболка тарту етті.
“Абдулла бұл жерде қазақтың қызының жүрегіне қалай жетіп тұр? Қазақша сөйлегеннің арқасында жетіп тұр. Менің сыйлайын деп отырғаным қарапайым ғана сый”, — деді Дулат Тастекей.
