Қарқаралы ауданында аса қайғылы оқиға орын алды. 53 жасында Қарағанды қаласының полиция басқармасы бастығының орынбасары, полиция полковнигі Бекжан Төлеуұлы Құсайынов қаза тапты. Бұл туралы SunqarNews.com ақпарат агенттігі хабарлады.
Бекжан Құсайынов 30 жылдан астам уақытын қоғамдық қауіпсіздікті қамтамасыз етуге және құқық тәртібін қорғауға арнады. Ол қызмет жолын 1992 жылы Қарқаралы аудандық ішкі істер бөлімінде бастаған. Қызметтік мансабында жауапты қызметтерді атқарып, Қарағанды қаласының полиция басқармасы бастығының орынбасары лауазымына дейін көтерілді. Қызметтестеріне кәсібилігімен, адамгершілігімен танылған.
Қарағанды облысының полиция департаменті мен ішкі істер органдарының ардагерлер кеңесі марқұмның отбасына және жақындарына көңіл айтты. Бұған дейін біз Қарағанды маңындағы жол апатынан екі адамның қаза тапқаны туралы жазған едік.
