ҚазҰУ – бұл тек қана жоғары білім алып, диплом иелену емес, бұл әр адамның өз болашағына бағытталған ең маңызды қадамдарының бірі. Университетке түскен жас талапкер, ең алдымен, өз арман-мақсаттарын жүзеге асыру үшін үлкен мүмкіндіктердің есігін ашады. ҚазҰУ-да білім алу – бұл үздіксіз ізденіс, әрдайым жаңа нәрселерді үйрену, өзіңді дамытып, қоғамға пайдасын тигізу үшін әрекет ету.
Мен үшін ҚазҰУ – болашаққа жол сілтейтін, білім мен ғылымның үйлесім тапқан мекені. Ол жерден алған білімімді, тәжірибемді туған елімнің өркендеуі мен дамуына жұмсайтын боларым күмәнсіз. Осы себепті ҚазҰУ менің ойымша, кез келген жастың өз арманын жүзеге асыруға арналған алғашқы қадамы болуы тиіс. Әрбір студенттің жүрегінде осы университеттің ұлағатты рухы мен жетістіктері жарқын болашаққа деген сенім ұялатса, бұл ҚазҰУ-дың жетістігі ғана емес, күллі Қазақстанның жетістігі болар еді.
Университеттің ғылыми бағытына көңіл бөлетін басты аспектілердің бірі – зерттеу нәтижелерін өндіріске енгізу, яғни, ғылым мен өндірістің байланысын нығайту. ҚазҰУ-дың ғылыми-зерттеу орталықтары тек теориялық ізденістермен шектелмей, оларды нақты тәжірибеде қолданып, еліміздің экономикасы мен қоғамына пайдалы жаңалықтар енгізуге бағытталған. Мысалы, университетте жасалған ғылыми зерттеулердің нәтижесінде әртүрлі салаларда, оның ішінде агрономия, экология, ақпараттық технологиялар және медицинада жаңа тәсілдер мен инновациялық шешімдер табылды.
ҚазҰУ студенттері мен жас ғалымдары ғылыми ізденістерді тек оқу процесінде ғана емес, сонымен қатар түрлі халықаралық конференцияларда, симпозиумдарда, ғылыми олимпиадаларда да көрсетеді. Бұл университет тек Қазақстан үшін ғана емес, бүкіл әлем үшін ғылымды дамыту жолындағы мүмкіндік алаңы.
Әл-Фараби атындағы ҚазҰУ-дың
I курс докторанты Ж.Ш. Дильдебаева,
PhD, доцент м.а. Н.А. Утемгалиева,
Ф.ғ.д., профессор Р.А. Авакова
