Сайөтес ауылындағы жағдай алаңдаушылық туғызуда: 1960-жылдары салынған екі қабатты 22 үйдің үшеуі 2023 жылы апатты деп танылды. Осыған байланысты 2024 жылы әрқайсысы төрт отбасына арналған жаңа үш үй салынып, тұрғындар көшірілді. Бұл туралы SunqarNews.com ақпарат агенттігі хабарлады.
Алайда, ауыл тұрғындары жаңа пәтерлерді жалға алу шартынан бас тартып отыр. Кілттерді таныстыру кезінде келісімшарт көрсетілмеген және пәтерлердің өмір бойы жалдамалы болатыны ешкімге айтылмаған. Тұрғындар баспаналарды жекешелендіріп беруді сұрайды.
Тұрғындардың айтуынша, келісімшартқа қол қоймағандары үшін коммуналдық қызметтер – газ, электр энергиясы және су – үзілген. Әкімдік үйдің кілтін қайтаруды талап етіп, сотқа арыз түсірмекші.
Маңғыстау ауданы әкімінің орынбасары Жандос Романұлы апатты үйлерге қатысты тұрғындарды жаңа баспанамен қамтамасыз ету Қазақстан Республикасы Үкіметінің 2013 жылғы №673 қаулысына сәйкес жүзеге асырылғанын айтады. Келісімшарт бойынша бұл пәтерлер жекешелендіруге жатпайды. Бүгінгі таңда тұрғындардың тек үшеуі келісімге қол қойған.
Айта кету керек, бұрын Атырауда апатты үйлерде тұратын 24 отбасыға жаңа баспаналар берілген болатын.
