Солтүстік Қазақстан облысының полиция департаменті 20 сәуір күні болған оқиғаның мән-жайын хабарлады. Нұрсұлтан Назарбаев пен Ғабит Мүсірепов көшелерінің қиылысында ардагер жарақат алды. Бұл туралы SunqarNews.com ақпарат агенттігі хабарлады.
9 жасар мектеп оқушысы ардагерді байқамай қағып кетіп, салдарынан зейнеткер Василий Макиенко жерге құлап, ауыр жарақат алды. Ол дереу медициналық мекемеге жеткізілді. Ардагер қажетті көмек алуда.
Полиция қызметкерлері оқиға куәгерлерін анықтап, тергеу жұмысын жалғастыруда. Оқиғаға құқықтық баға беріледі.
Солтүстік Қазақстан облысының әкімі Ғауез Нұрмұхамбетов ауруханаға барып, ардагердің жағдайын сұрап білді. Әкім өз жазбасында Василий Макиенконың белсенді өмір салтын ұстанатынын және Жеңістің 80 жылдығын отбасымен қарсы алуды күтетінін айтты. Сонымен қатар, жастардың ардагерлерге құрмет көрсетуі маңызды екендігін баса айтты.
Еске сала кетсек, Петропавлда жасөспірім қағып кеткен соғыс ардагері осыған дейін де ауруханаға түскенін жазған болатынбыз.
