Солтүстік Қазақстан облысында прокуратура органдары еңбек заңнамасының елеулі бұзылу фактілерін анықтады. Бұл туралы SunqarNews.com ақпарат агенттігі хабарлады. Айыртау, Ғ.Мүсірепов, Есіл, Жамбыл, М.Жұмабаев, Қызылжар, Шал ақын, Тайынша, Уәлиханов аудандары мен Петропавл қаласында 295 зейнеткерлік жасқа жетіп, жұмыстан шыққан қызметкерлерге жалпы көлемі 37,6 миллион теңге өтемақы төленбегені белгілі болды.
Сонымен қатар, Есіл, Ғ.Мүсірепов, Тайынша аудандарында 37 мұғалімге біліктілік арттыру курстары үшін 4,3 миллион теңгелік іссапар шығындары өтелмеген. Прокуратураның араласуымен кінәлі тұлғалар тәртіптік жауапкершілікке тартылып, 25 қызметкерге 4,9 миллион теңге көлемінде төлем жасалды. Қалған қызметкерлердің мәселесі бойынша жұмыс жалғасуда.
Жыл басынан бері прокуратура органдары 329 қызметкердің конституциялық құқықтарын қорғап шықты. Бұған дейін Петропавлда соғыс ардагерінің жарақаттануына байланысты тергеу жұмыстары жүргенін жазған едік.
