Ұлттық сапа орталығы Түркістан облысындағы 30-ға жуық асфальт-бетон зауытының жұмысын тексеріп, бес зауыттың мүлде жұмыс істемейтінін анықтады. Сонымен қатар, 24 зауыттың құжаттары толық емес болып шықты. Асфальт және бетон өндірісіне қажет материалдарға кіріс бақылауы жүргізілмеген, ал өнім сапасын тексеретін зертханалары жоқ. Бұл туралы SunqarNews.com ақпарат агенттігі хабарлады.
«Жол активтері ұлттық сапа орталығы» филиалының сапа және мемлекеттік есеп бөлімінің басшысы Қайрат Шәкіровтің айтуынша, жол құрылысының сапалы болуы үшін мердігерлер каръерден алатын қиыршық тас пен құмды сынақтан өткізуі тиіс. Жолға төсемес бұрын бұл материалдарды техникалық қадағалаушылар қайта тексеруі қажет. Егер бақылау тізбегі қатаң сақталса ғана, жол-құрылыс материалдарының сапасы жоғары болады.
Асфальт-бетон зауыттары нақты тәртіпке негізделіп жұмыс істеуі қажет. Бұл дегеніміз, қоспа бекітілген рецептураға сәйкес дайындалуы тиіс, ал асфальттың технологиялық төсеу процесі сақталуы керек. Орталыққа әзірше бір ғана зауыт барлық талаптарды орындап, қажетті құжаттарын ұсынған. Қалған зауыттарға мониторинг жалғасуда.
Айта кетейік, бұған дейін Шымкентте жастар орталығының басшысы әлеуметтік желідегі жазбаға лайк баспаған қызметкерлерді жазалағанын хабарлаған болатынбыз.
