Алматы қалалық мобильділік басқармасы жол жөндеу кезінде жиек тастардың қандай жағдайларда ауыстырылатынын мәлімдеді. Бұл туралы SunqarNews.com ақпарат агенттігі хабарлады.
Басқарманың айтуынша, жиек тастар негізінен жол-көлік оқиғаларынан зақымдалып, жылжып кетеді. Соның салдарынан асфальтта жарықтар пайда болады, бұл жолдың беріктігіне теріс әсер етеді. Жолдардың сапасын арттыру үшін асфальтбетон жабындысы төселген кезде жиектерді бір деңгейде орнату қажет.
Дегенмен, тегістеу міндетті түрде жиектердің ауыстырылуын білдірмейді. Тек ақаулы жиектер ғана ауыстырылады, ал көше жөндеу жұмыстары кезінде орташа алғанда жиектердің 3 пайызы ғана ауысады. Бұл – қала бойынша орташа көрсеткіш.
Райымбек батыр даңғылында BRT желісін салу кезінде де тек зақымдалған жиектер ауыстырылады, олардың саны ақау нәтижелеріне байланысты анықталады.
Бұған дейін Райымбек даңғылында BRT құрылысының басталатыны хабарланған. BRT желісінің ұзындығы 17 шақырымды құрап, оның 9 шақырымы Пушкин мен Ахрименко көшелерінің аралығында салынбақ. Жоба аясында автобустарға арналған арнайы жолақтар салынып, жаңа аялдамалар орнатылады.
