Жамбыл облысының әкімінің орынбасары Серік Сәлемовтің бастауымен өткен экологиялық тазалық шарасына ауыл қариялары мен 100-ге жуық жас қатысты. Нәтижесінде, «Айша бибі» кесенесінің айналасы ретке келтіріліп, жаңа көшеттер отырғызылды. Бұл туралы SunqarNews.com ақпарат агенттігі хабарлады.
Облыс әкімінің орынбасары Серік Сәлемов «Таза Қазақстан» акциясының маңыздылығын атап өтіп, жамбылдықтардың бұл шараға белсенді қатысып жатқанын жеткізді. «Жамбыл ауданындағы Айша бибі кесенесін тазалау — осы акцияның бір бөлігі ғана. Облыстың 28 елдімекенінде экологиялық шаралар ұйымдастырылып, 2 мыңнан астам адам жұмылдырылды», — деді Серік Сәлемов. Облыста 3500-ден артық тарихи-мәдени ескерткіш бар екенін ескерте отырып, ол осы аумақтарды абаттандыруға ерекше көңіл бөлініп отырғанын жеткізді.
Акция аясында Жамбыл облысында 350 шақырым каналдар мен арықтар, 48 мың тұрғын үй ауласы және 1,3 мың шақырым жолдар тазаланды. Барлығы 2,8 мың тонна қоқыс шығарылды. Жыл басынан бері 195 мың ағаш отырғызу жоспарланып, оның 128 мыңы егілді. Сонымен қатар, 2,4 мың ағаш санитарлық мақсатта бұталды.
Айта кетейік, бүгін Мемлекет басшысы да «Жастар» саябағында ағаш отырғызды, бұл бастама табиғатқа жанашырлық білдіруге шақырады.
