1 наурыздан бастап төтенше жағдайлар қызметі 5,2 миллион текше метр суды сору жұмыстарын жүргізді. Сондай-ақ, 684 мың қапшық пен 44 мың тонна инертті материал төселіп, 842 мың метрден астам арық тазаланды. Авариялық және құтқару жұмыстарына 288 адам, 121 техника, 33 мотопомпа және 6 жүзу құралы тартылды. Бұл туралы SunqarNews.com ақпарат агенттігі хабарлады.
Ақмола мен Солтүстік Қазақстан облыстарындағы автожолдардың екі бөлігінде су деңгейі қатаң бақылауда. Ақмола облысындағы Астрахан ауданының Ескі Қалқұтан ауылымен байланыс үзілді. Тұрғындарға арналған өткел ұйымдастырылып, жолды қалпына келтіру шаралары жүргізілуде.
Солтүстік Қазақстан, Шығыс Қазақстан және Абай облыстары су тасқыны бақылауына алынған. Шығыс Қазақстанда қардың 38%-ы әлі бар, ауа температурасының көтерілуіне байланысты кішігірім өзендер толуы мүмкін. Су тасқынына қауіпті аймақтарда су деңгейі тұрақты бақылауда.
Солтүстік Қазақстан облысында өзендерге тұрақты мониторинг жасалады, жағдай тұрақты. Заречное кентінде су тасқынына қарсы шаралар қолға алынды.
Абай облысында өзендердегі гидрологиялық жағдай тұрақты, мұз толық еріді және мониторинг жалғасуда. Қар тек Тарбағатай тау жоталарында қалған.
Петропавлға су тасқынының үшінші толқыны келе жатқаны бұған дейін хабарланған.
