Қазақстанда ақпарат саласындағы квазимемлекеттік сектор басшыларына жаңа жауапкершілік талаптары енгізілді. Бұл өзгерістер тікелей және түпкілікті нәтижелерге қол жеткізбегені үшін қатаң бақылауды көздейді. Жоғары аудиторлық палатаның ұсынымдары бойынша енгізілген бұл шара мемлекет ақпарат саясатын жетілдіруге бағытталған. Бұл туралы SunqarNews.com ақпарат агенттігі хабарлады.
Мемлекеттік ақпараттық саясатқа жүргізілген аудит барысында Бюджет кодексінде тиісті квазимемлекеттік компаниялар басшыларының мемлекет тапсырмаларын орындаудағы жауапкершіліктері жеткілікті деңгейде қарастырылмағаны анықталды. Мемлекеттік тапсырмалар арқылы азаматтар мемлекеттің маңызды жобалары мен бағдарламалары туралы хабардар болады. Осы себепті Жоғары аудиторлық палата Үкіметке заңнамаға өзгеріс енгізу қажеттігін ұсынды. Нәтижесінде 15 наурызда Мемлекет басшысы қол қойған жаңа Бюджет кодексінде квазимемлекеттік сектор басшыларының жауапкершілік нормалары бекітілді.
Айта кетейік, Жоғары аудиторлық палатаның нұсқауы бойынша бұған дейін бюджет қаражатын тиімсіз пайдалану фактілеріне, атап айтқанда жылу, су жабдықтау және су бұру жүйелерінің жаңғыртуына тоқтау салынған болатын.
